Lögð fram til staðfestingar fundargerð 909. fundar stjórnar sambandsins frá 27. apríl 2022.

Lagt fram til kynningar og umræðu minnisblað leiðtoga stafræns umbreytingateymis og breytingastjóra sambandsins, dags. 18. maí 2022, um stefnumótun um stafræna umbreytingu sveitarfélaga og samstarf. Einnig lögð fram skýrsla KPMG um greiningu á skrifstofuhugbúnaðarumhverfi sveitarfélaga, dags. í apríl 2022.
Fjóla María Ágústsdóttir kynnti nýtt stafrænt fjárhagsaðstoðarkerfi og gerði jafnframt grein fyrir helstu niðurstöðum í skýrslu KPMG ásamt því að svara spurningum fundarmanna.
Í skýrslu KPMG kemur skýrt fram að stafræn þróun er komin til að vera. Innri upplýsingatæknikerfi sveitarfélaga þurfa að styðja við aukinn hraða í þróun, sjálfvirkni og gagnavinnslu auk þess sem huga þarf betur að samvirkni þeirra kerfa sem á að nota. Almennt hafa upplýsingatækniumhverfi sveitarfélaga ekki haldið í við þróun síðustu ára og víða er mikil vinna framundan við að taka upp rafræna skjalavistun og gagnaskil, auk fleiri brýnna verkefna. Sveitarfélög þurfa því að setja í algeran forgang að móta stafrænar stefnur sem stuðla að því að þau haldi í við þá þróun í stað þess að bregðast við orðnum hlut.

Fyrir fundinum lá frammi skýrsla starfshóps um heildarendurskoðun laga nr. 38/2018, dags. í apríl 2022. Fylgiskjal með þeirri skýrslu er samantekt starfshóps um kostnaðarþróun í þjónustu við fatlað fólk 2018-2020, sem hefur að geyma mikilvægar upplýsingar um ástæður versnandi rekstrar í þessum málaflokki. Haraldur L. Haraldsson og Arnar Haraldsson gerðu grein fyrir meginniðurstöðum þessara skýrslna og svöruðu spurningum fundarmanna.

Sem dæmi um brýn verkefni sem blasa við í þessum málaflokki er að gera fimm ára áætlun um að leggja niður herbergjasambýli og vinna á biðlistum eftir sértækum búsetuúrræðum. Fyrir liggja tillögur um fjármögnun þess verkefnis, með öflugri aðkomu Fasteignasjóðs Jöfnunarsjóðs sveitarfélaga. Einnig er lagt til að hlutur fasteignasjóðsins í stofnkostnaði hæfingarstöðva verði aukinn. Þá er lögð áhersla á að sett verði á stofn búsetuúrræði fyrir yngri einstaklinga en 67 ára sem nú dvelja á hjúkrunarheimilum.

Lögð fram fundargerð 13. fundar stafræns ráðs sveitarfélaga frá 11. maí 2022.

Lögð fram fundargerð 73. fundar verkefnisstjórnar fyrir hagsmunagæslu í úrgangsmálum frá 16. maí 2022.

Lagt fram sem trúnaðarskjal minnisblað sviðsstjóra kjarasviðs sambandsins, dags. 17. maí 2022, um stöðu kjaramála í maí 2022. Sviðsstjóri gerði nánari grein fyrir helstu verkefnum á borði kjarasviðs.

Lagðar fram niðurstöður starfshóps um aðgerðir og umbætur á húsnæðismarkaði, dags. 19. maí 2022, ásamt glærukynningu og fylgiskjölum

Lagt fram minnisblað framkvæmdastjóra og sviðsstjóra rekstrar- og útgáfusviðs, dags. 18. maí 2022, um skipun sex manna kjörnefndar sem gerir tillögu að stjórnarkjöri á landsþingi sambandsins haustið 2022, sbr. 9. gr. samþykkta sambandsins.

Lagt fram til kynningar bréf sambandsins til dómsmálaráðuneytisins, dags. 27. apríl 2022, þar sem Pétur Pétursson, slökkviliðsstjóri Brunavarna Árnessýslu, er tilnefndur í stjórn samhæfingar- og stjórnstöðvar.

Lagt fram til kynningar bréf sambandsins til félags- og vinnumarkaðsráðuneytisins, dags. 6. maí 2022, þar sem María Ingibjörg Kristjánsdóttir, félagsþjónustufulltrúi á lögfræði- og velferðarsviði sambandsins, er tilnefnd til áframhaldandi setu sem aðalmaður í flóttamannanefnd, og Þórður Kristjánsson, sérfræðingur á lögfræði- og velferðarsviði sambandsins, til áframhaldandi setu sem varamaður.

Lagt fram til kynningar bréf sambandsins til fjármála- og efnahagsráðuneytisins, dags. 6. maí 2022, þar sem Helgi Aðalsteinsson, sérfræðingur á kjarasviði sambandsins, er tilnefndur í Kjararannsóknanefnd opinberra starfsmanna.

Lagt fram til kynningar bréf sambandsins til mennta- og barnamálaráðuneytisins, dags. 16. maí 2022 þar sem Hákon Sigursteinsson, framkvæmdastjóra Barnaverndar Reykjavíkur, og Heiða Ösp Kristjánsdóttir, deildarstjóri félagsþjónustu Árborgar, eru tilnefnd í starfshóp um áföll barna.
Það þeirra sem ráðherra skipar ekki verður varamaður hins.

Lagt fram til kynningar bréf sambandsins til mennta- og barnamálaráðuneytisins, dags. 17. maí 2022, þar sem María Ingibjörg Kristjánsdóttir, félagsþjónustufulltrúi á lögfræði- og velferðarsviði sambandsins, og Þórður Kristjánsson, sérfræðingur á lögfræði- og velferðarsviði sambandsins, eru tilnefnd í stýrihóp um aðgengi að þjónustu fyrir börn.
Það þeirra sem ráðherra skipar ekki verður varamaður hins.

Lögð fram til kynningar umsögn sambandsins til velferðarnefndar Alþingis, dags. 25. apríl 2022, um frumvarp til laga um aðbúnað, hollustuhætti og öryggi á vinnustöðum (vinnutími starfsmanna sem veita notendastýrða persónulega aðstoð), 590. mál.

Lögð fram til kynningar umsögn sambandsins til velferðarnefndar Alþingis, dags. 17. maí 2022, um frumvarp til laga um breytingu á ýmsum lögum í þágu barna (samþætting þjónustu í þágu barna, snemmtækur stuðningur), 530. mál.

Lögð fram til kynningar umsögn sambandsins til fjárlaganefndar Alþingis, dags. 16. maí 2022, um fjármálaáætlun 2023-2027, 513. mál.